Las linhas d'autòbus

« Los parents, quand arribèron de París, montèron la linha de Sauvatèrra a Rodés. I aviá una concuréncia tarribla. A Sauvatèrra, n’i aviá dos que fasián l’autòbus sus Rodés. Un anava mème cargar lo monde davant lor pòrta a Sauvatèrra. Alara mon paire sia(gu)èt oblijat de far un pauc coma aquò atanben.
I aviá totjorn dètz, quinze personas que montavan sus Rodés. Aviam de monde mai que ne podiam prene. Aquò èra lo que arribava lo prumièr a La Barraca. Sus la rota, aquò èra la corsa. Nos arrestàvem, nos tornavan passar davant...
Cargàvem los pòrcs sul camion o sus l’aubòbus. L’autòbus èra amenatjat en camion. I fotiam de cledisses dedins. Pièi, i passàvem de jornadas per netejar, que lo lendeman, l'autòbus portava lo monde a Rodés. Aviam lo valat a Sauvatèrra, i fotiam l'autòbus, que pengèsse un pauc, e lo netejàvem ambe lo farrat. »